Sociedá

El chigre na lliteratura asturiana ye tema de debate na Arribada

La «vagamar lliteraria» conocida como L’Arribada, y que sigue celebrándose en Xixón, tien prevista pal miércoles 30 d’ochobre, a les 20:30 hores, nel patiu del Centru de Cultura Antiguu Institutu, una tertulia onde va tratase sobre les rellaciones ente’l chigre y la lliteratura asturiana. Pa debater sobre esti asuntu van tar presentes los escritores Xuan Xosé Sánchez Vicente, David M. Rivas, Xicu Monteserín y Xosé Nel Riesgo.

Enantes d’ello van facese les presentaciones, nel mesmu sitiu, del llibru de poemes Orbayu d’alfileres de Carlos Suari (17:00 hores), del Diccionariu Asturianu-Castellanu de Xuan Xosé Sánchez Vicente (17:30 hores) y del poemariu El combate melancólicu d’Ignaciu Llope (18:00 hores). Depués d’esta ultima presentación, la compañía Nun Tris va representar la obra de teatru Camín del escaezu, sobre poemes d’esti mesmu autor.

Amás d’eso, Xuan Xosé Sanchez Vicente va ufiertar la ponencia titulada Sidre, borrachos y espiches na lliteratura clásica y prexurdimientu (19:30 hores).Esta Arribada 2009, la más llarga dende la so nacencia, va siguir col desarrollu del so estensu programa hasta’l sábadu 3 d’ochobre. Nella axúntase bona parte de los escritores en llingua asturiana qu’hai na actualidá y representa un puntu d’alcuentru y d’intercambiu d’esperiencies ente toos ellos.