Arte

Espónense les obres del VI Concursu de Cómic n’Asturianu

Cartelu del concursu.

Ente’l 4 y el 13 de mayu van poder vese nel Salón d’Actos de la Casa de la Cultura de Colunga (Carretera xeneral, 23) les obres seleccionaes y premiaes nel VI Concursu de Cómic n’Asturianu entamáu un añu más pol Serviciu de Mocedá de la Comarca de la Sidra (qu’axunta a los conceyos de Villaviciosa, Colunga, Cabranes, Sariegu, Nava y Bimenes). El ganador d’esta edición foi’l xixonés Manuel García Iglesias, col trabayu tituláu La misión, mientres que los finalistes foron Sebastián Mulero y Juan Miguel Borja Estévez.

     Esti concursu enmárcase dientro de les iniciatives entamaes pola Mancomunidá de la Sidra p’afalar la creación artística y rexistra en cada edición nueva un númberu de participantes bultable. Ye, amás, ún de los pocos existentes dedicáu específicamente a xuntar historieta y llingua asturiana.

    Ta previsto que, como nes ocasiones anteriores, la obra premiada, más les finalistes y aquelles otres seleccionaes, s’espublicen nun volume.