Llibros

Ramón d’Andrés edita n’Ámbitu «L’asturianu que vien»

Portada del llibru de Ramón d'Andrés.

La editorial Ámbitu ta acabante editar «L’asturianu que vien», unes observaciones y suxerencies sobre l’asturianu normativu y el so usu debíes al profesor de la Universidád’Uviéu, y miembru del Seminariu de Llingua Asturiana y de l’Academia de la Llingua, Ramón d’Andrés.

Nesti llibru reflexónase sobre lo que ye normativizar una llingua: da-y normes prescriptives (ortográfiques, gramaticales, léxiques y ortolóxiques) que faigan posible usala como instrumentu de comunicación formal. Nos años 70 l’asturianu entamó un procesu de normativización qu’agora ta mui trabayáu en munchos aspectos, pero que tien importantes cuestiones pendientes relacionaes col usu prácticu n’ámbitos formales como’l periodísticu, el xurídicu, el lliterariu, el científicu y tantos otros.

El profesor Ramón d’Andrés –que yá fora autor de dalgunos ensayos y estudios fundamentales pa la normativización de la llingua asturiana– intenta nesti volume aportar cuando soluciones, cuando reflexones a estes cuestiones pendientes, faciéndolo siempre con una claridá espositiva onde relluma la intuición, el conocimientu y la intelixencia.